Visit and subscribe to our you Tube channel

Umubyeyi magazine You Tube channel

Advertisements

Uko wakwirinda kuganzwa n’uburakari

Uburakari twese turabuzi ni ibyiyumviro bidashimishije bibabaza ubabajwe.

Uburakari burabangama,butera umutima mubi,butera kugira ibitekerezo bibi ndetse ukavaho wanakora ibidakwiye ndetse ukavuga n’amagambo adakwiye.

Hari inzira yoroshye cyane wacamo kugirango wirindira bene izo ngaruka.Fata urupapuro utangire wandike nk’aho wandikira umuntu wakurakaje,iveyo wese umubwire kuva byatangira kugeza igihe wabonye ko yakubabaje,aha ushobora kurira cyangwa ushobora gusakuza bitewe n’uko uri kwiyumva,wigira ibyo utinya kwandika ,andika byose ubimareyo,mukurangiza kwandika ushobora kuzagira umwanzuro wafashe,ingamba ugiye gushyiraho,mbese uko ushaka ko ibintu bizagenda.

Fata rwa rupapuro uruzinge urushyire muri envelope wandikeho n’amazina ye ,waruca,warutwika,warubika amahitamo ni ayawe.Ubundi wicare utuze cyangwa wirambike.Impamvu mbivuga ni uko nyuma yo kwandika uba uruhutse cyaneeeeeee kuburyo uba wumva ntakindi wakora,uba wumva umutima ukeye.

Ndababwiza ukuri iyinzira iraruhura,iyi nzira iranoze.

Mureke duharanire amahoro y’umutima!

Icyumweru cyiza

*AMASOMO N’INYIGISHO YO KU CYUMWERU CYA IV GISANZWE(03/02/2019), UMWAKA C W’IGIHARWE.*

*Abatagatifu: Brazi, Osikari, Adeline, Anatoli, Selerini.*

*ISOMO RYA MBERE.*

*Isomo ryo mu gitabo cy’Umuhanuzi Yeremiya (Yer 1, 4-5.17-19).*

4Uhoraho yambwiye iri jambo ati 5“Ntarakuremera mu nda ya nyoko nari nkuzi; nakwitoreye utaravuka, nkugira umuhanuzi w’amahanga. 17Naho wowe kenyera ukomeze, uhaguruke maze ubamenyeshe ibyo ngutegetse kubabwira. Ntuzareke bagutera ubwoba, kuko nubugira ari wowe, nzagutera guhinda umushyitsi imbere yabo. 18Jyewe uyu munsi nkugize nk’umurwa ukomeye, inkingi y’icyuma, cyangwa nk’inkike y’umuringa imbere y’igihugu cyose, imbere y’abami ba Yuda, abatware bayo, abaherezabitambo bayo n’abatuye igihugu bose. 19Bazakurwanya ariko ntibazagushobora – uwo ni Uhoraho ubivuze – humura turi kumwe ndagutabara.”

Iryo ni ijambo ry’Imana.

*ZABURI*

*Zab 71 (70), 5-6b, 7-8, 15ab.17, 19.6c.*

*Inyikirizo: Mana yanjye, iminsi yose nzamamaza ubutwari bwawe n’agakiza kawe.*

Ni wowe mizero yanjye Nyagasani,
Uhoraho, ni wowe niringira kuva mu buto bwanjye.
Narakwisunze kuva nkivuka,
unyitorera nkiva mu nda ya mama.

Abenshi baketse ko wamvumye,
kandi ari wowe buhungiro bwanjye.
Umunwa wanjye wuzuye ibisingizo byawe,
iminsi yose ndirimba ikuzo ryawe.

Nzatangaza ukuntu uri indahemuka,
iminsi yose namamaze agakiza kawe.
Mana, wanyiyigishirije kuva mu buto bwanjye,
na n’ubu ndacyarata ibyiza byawe.

Mana, ubudahemuka bwawe burahebuje,
wowe wakoze ibintu by’agatangaza.
Mana, ni nde uhwanye nawe?
Ni cyo gituma nzahora ngusingiza.

*ISOMO RYA KABIRI.*

*Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti (1Kor 12, 31; 13, 1-13).*

Bavandimwe, 12,31nimuharanire ingabire zisumbuye, kandi ngiye kubereka izitambutse zose. 13,1N’aho navuga indimi z’abantu n’iz’abamalayika, ariko singire urukundo, naba ndi nk’icyuma kibomborana cyangwa inzogera irangira. 2N’aho nagira ingabire y’ubuhanuzi, ngahishurirwa amayobera yose n’ubumenyi bwose; n’aho nagira ukwemera guhambaye kumwe gushyigura imisozi, ariko ndafite urukundo, ntacyo mba ndi cyo. 3N’aho nagabiza abakene ibyo ntunze byose, n’aho nahara umubiri wanjye ngo utwikwe, ariko nta rukundo mfite, nta cyo byaba bimariye.
4Urukundo rurihangana, rwitangira abandi, ntirugira ishyari; urukundo ntirwirarira, ntirwikuririza; 5nta cyo rukora kidahwitse, ntirurondera akari akarwo, ntirurakara, ntirugira inzika; 6ntirwishimira akarengane, ahubwo ruhimbazwa n’ukuri. 7Urukundo rubabarira byose, rwemera byose, rwizera byose, rukihanganira byose.
8Urukundo ntiruteze gushira. Ubuhanuzi se? Buzashira. Indimi zo se? Zizaceceka. Ubumenyi se? Buzayoka. 9Koko ubumenyi bwacu buracagase, kimwe n’uko ubuhanuzi bwacu bucagase. 10Igihe rero ibyuzuye bizahinguka, iby’igicagate bizazimira! 11Mu gihe nari umwana navugaga ay’abana, ngatekereza nk’abana, nkazirikana nk’abana; aho mbereye umugabo nikuyemo ibya rwana byose. 12Ubu ngubu turasa nk’abarebera mu ndorerwamo ku buryo
budafututse, ariko hari igihe tuzarebana imbonankubone. Ubu ngubu ibyo nzi biracagase, ariko icyo gihe nzamenya nk’uko nzwi. 13Kugeza ubu ukwemera, ukwizera n’urukundo uko ari bitatu birabangikanye, ariko icy’ingenzi muri byo ni urukundo.

Iryo ni Ijambo ry’Imana.

*IBANGO-NDIRIMBO RIBANZIRIZA IVANJILI: Zab 67 (66), 3.*

Alleluya Alleluya.
Guhera mu burasirazuba kugera mu burengerazuba,
amahanga yose azamenya ko Imana yacu ari yo ikiza.
Alleluya.

*IVANJILI NTAGATIFU.*

*Amagambo yo mu Ivanjili Ntagatifu uko yanditswe na Mutagatifu Luka (Lk 4, 21-30).*

Mu isengero ry’i Nazareti, nyuma y’isomo ryo mu gitabo cy’Umuhanuzi Izayi, 21Yezu arababwira ati “Ibiri mu isomo mumaze kumva, mumenye ko byujujwe uyu munsi.” 22Bose baramushima, kandi batangazwa n’amagambo y’ineza yababwiraga. Ni ko kuvuga bati “Uyu si mwene Yozefu?” 23Yezu arababwira ati “Nta gushidikanya mugiye kuncira wa mugani ngo ‘Muganga, banza wivure ubwawe!’ Twumvise ibyo wakoreye i Kafarinawumu byose, ngaho bikorere na hano iwanyu.”
24Yungamo ati “Ndababwira ukuri: nta muhanuzi ushimwa iwabo. 25Ndababwiza ukuri rwose: hariho abapfakazi benshi muri Israheli mu gihe cya Eliya, ubwo imvura yamaraga imyaka itatu n’amezi atandatu itagwa, inzara ikoreka igihugu cyose; 26nyamara muri bo nta n’umwe Eliya yoherejweho, uretse umupfakazi w’i Sareputa ho mu gihugu cya Sidoni. 27Hari kandi n’ababembe benshi muri Israheli mu gihe cy’umuhanuzi Elisha; nyamara muri bo nta n’umwe wakijijwe, uretse Nahamani w’Umusiriya.” 28Abari mu isengero bumvise ayo magambo bose barabisha, 29nuko bahagurukira icyarimwe bamusohora mu mugi wabo, bamujyana hejuru y’imanga y’umusozi umugi wabo wari wubatseho bagira ngo bahamurohe. 30Nyamara we abanyura hagati arigendera.

Iyo ni Ivanjili Ntagatifu.

*************************************

*INYIGISHO*

Yezu Kristu akuzwe!

Nyagasani Yezu Rumuri rw’amahanga aduhingutseho, mu bubasha bw’ijambo rye, kugira ngo akomeze adutsindire umwanzi Sekibi, maze amubuze kutubuza amahoro n’amahwemo. Aturagire mu rwuri rwe nk’Umushumba mwiza; mu rwuri rw’amahoro, rw’ibyishimo, rw’urukundo rutagira uwo ruheza; urukundo rwitanga.

Nyagasani Yezu rero, aratwereka uyu munsi ububasha bwe, buragiye ubushyo bwe, bukoresheje ijambo rye, bukoresheje urukundo rwe. Nyagasani Yezu aratwereka ububasha bwe budafatwa n’abantu, budahagarikwa n’abantu, nk’uko Ivanjili irangira bavuga bati «Nuko bahagurukira icya rimwe bamusohora mu mugi wabo, bamujyana hejuru y’imanga y’umusozi umugi wabo wari wubatseho bagira ngo bahamurohe. Nyamara we abanyura hagati arigendera.»

Nyamara we abanyura hagati arigendera! Yezu Kristu ni Nyir’ububasha budahagarikwa n’inabi y’abantu. Ubwo bubasha rero abugaragariza mu bahanuzi be; nk’uko atwereka mu isomo rya mbere, urugero rw’umuhanuzi Yeremiya, igihe abwirwa n’uhoraho ati “Jyewe uyu munsi nkugize nk’umurwa ukomeye, inkingi y’icyuma, cyangwa nk’inkike y’umuringa imbere y’igihugu cyose, imbere y’abami ba Yuda, abatware bayo, abaherezabitambo bayo n’abatuye igihugu bose. Bazakurwanya ariko ntibazagushobora – uwo ni Uhoraho ubivuze – humura turi kumwe ndagutabara.”

Ububasha bwa Yezu Kristu bugaragarira mu ntumwa ze, zumvise koko icyo Uhoraho ashaka mu be:”Nimuharanire ingabire zisumbuye, kandi ngiye kubereka izitambutse zose.” Ari Pawulo Intumwa Mutagatifu utubwira: “N’aho navuga indimi z’abantu n’iz’abamalayika, ariko singire urukundo, naba ndi nk’icyuma kibomborana cyangwa inzogera irangira.”

Uyu munsi rero, Nyagasani Yezu Kristu aratwereka imbaraga ze zirengera abahagarara mu izina rye, bamagana ikibi. Ariko atari bo biyohereje (ubwo nanze gukoresha rya jambo rindi), ahubwo boherejwe na We, batumwe na We; atari bo biyoherehe.

Koko rero, guhanura ntabwo ari ukwamagana ibibi bikubangamiye. Ni ukwamagana ibibi Yezu yakohereje kwamamagana. Ni yo mpamvu ari ubutumwa uhabwa, ntabwo ari ubwo wiha. Ntabwo ari icyemezo ufata, ngo “Ubu ngubu rero jyewe ngiye gukora gutya na gutya.” Wowe se uri iki? Uri nde? Ese niba Roho Mutagatifu adahushye, ngo agushyiremo amagambo ye, uzavuga iki, usibye amagambo yawe bwite atazagira icyo amara?

Nyagasani Yezu rero, amara ubwoba abo atuma. Ariko ntabwo ababuza kwangwa. Nta n’ubwo abuza ko abantu babarwanya nk’uko na We byamugendekeye bityo; turabibona mu Ivanjili. Wagira ngo biri mu butumwa ubwabwo, ko abantu bavuze koko mu izina rya Nyagasani Yezu by’ukuri, hagira abantu babarwanya. Bazakurwanya ariko ntibazagushobora. “Humura turi kumwe ndagutabara.”

Nta we rero ugomba gutinya gutumwa na Yezu. Kubera ko imbaraga zigukoresha si izawe ni ize. Uko Nyagasani Yezu agaragaza ububasha bwe, anyura hagati ya bariya bari bagiye kumugirira nabi, nta cyo bamukozeho; imbaga yose yahagurutse yuzuye umujinya igataha yimyije imoso, nta we Umukojejeho ikiganza, ni na ko umuntu wese Nyagasani Yezu arindishije ububasha bwe, niba ashaka ko akora ubutumwa runaka, nta we ushibora kubiburizamo. Kugira ngo rero akenshi ibyo ngibyo bidakorwa, Sekibi, Sebwoba, yo ikoresha amayeri yayo ikabiba ubwoba mu bagombye kugira icyo bavuga.

Uyu munsi rero, Nyagsani Yezu aragira ngo abantu bose yohereza bakire ubwoba. Ese ubundi n’aho bakwica, uzapfa kabiri? Ese ubundi n’aho wapfa, twebwe abakristu turapfa, ko Yezu Kristu yatsinze urupfu? Ntabwo rero ugomba gutinya. Niba koko wumva ko ari ubutumwa Yezu Kristu aguhaye, atari umujinya ukurimo kubera ko warakariye abantu b’abagiranabi, ahubwo ari urukundo rwakuzuye rwo gushaka gusenya ikibi, rwo gushaka kurengera abo akarengane kamereye nabi; nk’uko nyine Pawulo Intumwa abisobanura yuzuye Roho Mutagatifu.

Urukundo: ingabire isumba izindi. Nta kindi kindi cyagombye guhirimbanya abantu, nta rindi shyaka bagombye kuzura usibye iryo kurwanirira urukundo, no kurwanya ikitari rwo. Ingabire isumba izindi! Urwo rukundo rero ruhimbazwa n’ukuri. Ntirwishimira akarengane. Umuntu ashobora kuvuga ati” Urukundo ni we muhanuzi nyawe, kuko nta we rugamije kugirira nabi, kabone n’aho we yaba ari umugiranabi, kubera ko urukundo rurababarira, rwihanganira byose, rwemera byose. Ariko nyamara, rugamije kwigarurira ahantu hose rutari; gusenya ikitari rwo cyose, rukoresheje intwaro z’urumuri.

Nyagasani Yezu Kristu rero, agiriye amasengesho ya Bikira Mariya, niyohereze ku isi abahanuzi b’urukundo. Abo bose bigisha abandi gukunda uko Yezu Kristu yadukunze, bakarwanya ikintu cyose gisenya urwo rukundo nta we batinye. Batavuze ngo ni uko itegeko ryagiyeho; Ngo “bemeye ko abantu bashobora gukuramo amada!” Uwo mwana arazira iki? Nta wundi uzamuvugira usibye twebwe. Ubwo se niba tutavuze uwo mwana akicwa, tuzabibazwa. Mu izina rya Yezu Kristu twamaganye gukuramo inda kose, aho kwakorerwa hose, n’igihe kwakorerwa cyose, n’uko kwakorwa kose. Uwo mwana afite uburenganzira bwo kubaho, si wowe wamuremye.

Nyagasani Yezu Kristu ni Inzira Ukuri n’Ubuzima. Nyagsani Yezu Kristu ni Urukundo.
Ariko abo ngabo bose kubera ubujiji, kubera umwijima bagiye bagwa muri icyo cyaha cyo gukuramo amada, Yezu arabakunda. Nimusabe Yezu imbabazi. Yezu ni Nyir’impuhwe, azabababarira. Ariko wivuga ngo ugiye kubikora hanyuma uzababarirwe, Oya. Icyo gihe urifungira amayira izo mbabazi zanyura zigusanga.

Nyagasani Yezu Kristu nabuganize muri Kiliziya ye ingabire y’ubuhanuzi; abo bose buzuye imbaraga nta bwoba bafite bwo kuvuga bati “kiriya si cyo, kiriya ni cyo. Yezu Kristu ni muzima. Sekibi ni Sekibi.” Wimwita irindi zina. Kuki ushaka kuvuga ko ikinyoma atari ikinyoma? Bitewe n’uwakivuze, bitewe n’aho cyavugiwe? Sekinyoma ni Sekinyoma. Kuki ushaka guhindura izina rye? Sebusambanyi ni Sebusambanyi, ni na Serupfu. Kuki ushaka guhindura izina rye?

Nyagasani Yezu Kristu nabuganize uwo Roho we mu bigisha bose, bareke guhinda imishyitsi. Igihe Roho Mutagatifu avuze ati “Vuga; amagana kiriya”, ahinda imishyitsi kubera iki? Imbaraga zikurimo ziruta iz’abakurwanya aho baba bari hose, n’intwaro baba bitwaje izo ari zo zose. Wigira ubwoba, nk’uko nyine umuhanuzi Yeremiya abibwirwa:”Bazakurwanyariko ntibazagushobora. Humura turi kumwe ndagutabara.”

Ngwino Roho Mutagatifu.
Mutima utagira inenge wa Bikira Mariya, uturengere uturwaneho mu izina rya Yezu.
Bikira Mariya Mwamikazi wa Karumeli, udusabire.

Singizwa Yezu Kristu wadupfiriye ukazuka!

Yezu ndakwizera.

Padri Jérémie Habyarimana
Coslada, Madrid.

Isengesho rya Mugitondo

👤ISENGESHO RYA BURI GITONDO

-Nyagasani Mana, Mu bucece bw’uyu munsi utangiye, Nje kugusaba ubwitonzi, amahoro n’imbaraga, ubushishozi no kwihangana.

-Ndashaka kurebesha isi amaso yuzuye urukundo.

-Umfashe kwihangana, kumva abandi, gutuza no kwitonda, Umpe kurenza amaso ibyo mbona, ndebe abana bawe nk’uko wowe ubareba, bityo mbone ibyiza muri buri wese.

-Ubuze amatwi yanjye kumva abasebanya, ubuze ururimi rwanjye Kuvuga ubidakwiye, maze ibitekerezo byiza bibe aribyo biba muri jye.

-Unyigishe kwakira abandi neza no guhora nishimye Kuburyo abanyegera bose bumva ko ndi kumwe nawe.

-Nyagasani Mana, nyambika ubwiza bwawe kandi uyu munsi wose mbe ari wowe namamaza, ndusheho kugushimisha nshimisha abo duhura no kugushimira ibyiza unyereka none.

Amina.

Uhoraho ni umushumba mwiza

Uhoraho niwe mushumba wanjye,ntacyo nzabura!

Andagira murwuri rutoshye,akanshora ku mariba y’amazi afutse,maze akankomeza umutima.

Anyobora inzira y’ubutungane,abigiriye kubahiriza izina rye.N’aho nanyura mu manga yijimye ntacyankura umutima,kuko uba urikumwe nanjye,inkoni yawe y’ubushumba intera ubugabo.

Imbere yanjye uhategura ameza,abanzi banjye bareba,ukansiga amavuta mumutwe,inkongoro yanjye ukayisendereza.

Koko ineza n’urukundo byawe biramperekeza,mugihe cyose nzaba nkiriho.

Nanjye rero nzaza niturire mungoro y’Uhoraho,abe ariho nibera iminsi yose.