Uraririmba cyangwa urapfa?!

Ngiye kubabwira inkuru y’abasore babiri bari bageze mugihe cy’imyiteguro y’ubukwe bikaza kurangira babenzwe ,iyumvire uburyo byagenze.

Habayeho abasore babiri bari inshuti,bapangira hamwe ubukwe bwabo mumataliki akurikirana,umusore wambere umukobwa bendaga kubana araza aramubwira ati rero cheri wanjye iby’ubukwe nabivuyemo unyihanganire,umusore ati reka reka ntibishoboka ,ngwino tubivugeho neza dukosore ikitagenda neza,umukobwa aratsemba ati ahubwo ntuzongera kumbona,umusore biramuyobera ati njye sinaseba ndiyahura,aragenda azamuka muri etaje yakarindwi arasimbuka nuko arapfa.

Umusore wakabiri nawe byaje kumugendekera kimwe n’uwambere  nawe umukobwa biteguraga kurushinga  araza aramusezera,umusore ati ok urugendo rwiza!bagenzi be,abo mumuryango we,batangira guta umutwe bibaza ko nawe ashobora kwiyahura,bamugenze iruhande ngo wenda atagira ibyo anywa agasinzira.Batangira kumwigisha bati humura uzabona undi ,utubabarire ntufate icyemezo kigayitse cyo kwiyahura.Yahise ababwira ati ahubwo nimpumerekeze tujye muri studio,bemeye bihuta ariko banibaza ibyo bagiye gukora muri studio,mukugenda rero agenda ababwira ati buriya hari byinshi nakize,wasanga twarikuzabana nabi,tutunvikana,muntonganya,mubukene,mubibazo byinshi bitandukanye ariko imana iciye inzira hakiri kare,bageze muri studio atangira kuririmba arahanika ,ahumuriza abantu bose babenzwe,ahumuriza ababuze urukundo ababwirako anna yagenda hakaza Marita ariko amahoro agahinda,umutima ukagubwa neza.Indirimbo ye yaje gukundwa cyane,aramenyekana cyane,ahantu hose bakajya bamutumira ngo aze aririmbe,imitima yabenshi irabohoka.Ibibi byamubayeho bimubera intangiriro y’ubuzima bushya.Igitangaje ni uko bwari ubwambere aririmbye!

Nonese wowe urahitamo iki mubigeragezo ubayemo,uraririmba cyangwa urapfa?!

Iyi nkuru itubere isomo ryo gukura icyiza mukibi uko byagenda kose,niba wageze hasi,niba wacitse intege,niba ubayeho mubuzima utishimiye,niba uri gutotezwa,niba urikubura agaciro,wicika intege ahubwo haranira gukuramo isomo no gufata icyemezo cyiza uko byakugora kose. Hitamo guca ukubiri n’ibigushengura umutima,hitamo guca ukubiri n’urwango uhura narwo,hitamo guca ukubiri n’abakubwirako ntaho uzagera,hitamo guca ukubiri n’abakubwirako ntacyo umariye umuryango,ibyo bibi byose wumvaaaaaaaaaaaaaaaa ubihinduremo urwego wuriraho.

Igihe ni iki hitamo neza,fata icyemezo cyiza!

Advertisements

Yampaye urukundo rw’umwimerere!

Ubwo twahuraga nari meze nk’ubutaka bw’agasi bwabuze amazi bukumirana! Nyuma yo kukumenya no kuvugana nawe umutima wanjye wakwakiriye nk’umwami nanjye nemera kukubera umwamikazi.

Hari mu kwezi kwa cumi n’abiri mu mwaka wa 2008 aho nemeye ntashidikanya koko ko burya urukundo nyarwo rw’umwimerere rubaho, rufatira igihe rushakiye rugafata n’uwo rushaka aho imitima yuzuzanya, aho amagambo yuzuzanya, aho ibikorwa byuzuzanya, aho ibitekerezo byuzuzunya, ibintu bikagenda gahoro gahoro bikikora nta mbaraga n’agahato byashyizwemo. Icyo gihe umutima waranyongoreye uti: “Ni uriya umwami w’umutima wawe!” Ariko ndikanga ngira ngo ndarota, mbanza kubyirengangiza ndibwira nti “Usara kwinshi Simbi we! Uriya muntu ntaho muhuriye arenze ubushobozi bwawe nta cyiciro na kimwe muhuje!”

Nakomeje kwirengangiza ndirengangiza ariko mu bwonko bwanjye niwe wari wuzuyemo, murota amanywa n’ijoro ambuza amahoro, ambuza amahwemo nkatekereza ko nasaze,ngafunga amaso ngo ndebe ko yagenda bikanga! Gusa ahantu twahuririaga twararamukanyaga bisanzwe nanjye ngatambuka, erega nakoraga akazi k’amasuku mu kigo yari ahagarariye , bya byiciro nababwiraga bidahuye murabyumva noneho! Ibiro bye nabikoragamo isuku ku buryo akantu kose nakitonderaga kugira ngo yicare ahantu hasa neza. Igihe cyaje kugera rero antuma “papier mouchoir” ariko ngeze aho zigurirwa nsanga ni nyinshi nyoberwa iyo muzanira nuko rero nsaba abo dukorana nimero ya telephoni ye ndamuhamagara musobanuza, niho nahereye nyitunga. Byarakomeje akajya ambaza amakuru yanjye, uko naramutse, ati ese wize ayahe mashuli nti narangije amashuri yisumbuye ni uko nabuze akazi k’ibyo nize, ariko numvise hano bashaka umukozi w’isuku nzana dosiye barakampa, nanze kuba inkora busa niyemeza gutangirira kuri aka gaciriritse numvaga mfite icyizere cy’uko nzagenda nzamuka ubuzima bwanjye bukagenda burushaho kuba bwiza. Uko namubwirga ibyanjye, yarandebaga mbona amarira azenze mu maso arampoberaaa ati:” Uri urugero rwiza ku bandi, nibura byabera isomo abandi bantu binemfaguza amahirwe y’akazi babonye ngo ntigahuye n’ibyo bize.” Aranshimira cyane n’uko turatandukana. Hashize nk’amezi atandatu bampinduriye akazi njya gukora kuri reception kuko uwahakoraga yari yasezeye, narishimye cyane ku buryo mutakumva, nahembwe nizigama nkora amahugurwa y’indimi ku buryo navugaga ntategwa. Sinatinze kuri reception hari umwanya wabonetse muri comptabilite nuko nkora ikizami ndatsinda. Murabyumva rero nagiye nzamuka kandi neza.

Umutima wakomeje kunyishyuza wa mwami wanjye ariko nkumva ko bidashoboka, twarandikiranaga kuri “WhatsApp” mbese ugasanga ibintu byinshi tubyumva kimwe, tukungurana ibitekerezo, ubwo rero twaba tutavuganye nkabura amahoro, nkumva isi indangiriyeho. Hari igihe twigeze kuganira tuvuga ukuntu abantu baharara ahantu ho gusohokera ndavuga nti n’aho barambiwe ntaho nzi aho baharaye rero sinakwirirwa mpatekereza! Mu bisubizo nari niteze nta na kimwe nabonye, yaransubije ati”Humura igihe cyacu kizagera.” Numvise nishimye ariko nkumva ko bidashoboka k’umuntu twamenyanye anzi nkora akazi k’isuku ku bwanjye numvaga atari urwego rwanjye. Urukundo rwarushagaho kwiyongera uko bwije n’uko bukeye ariko nkibwira ko ari ubusazi ko ndamutse ngize amahirwe nabona aho nivuza kuko nabonaga nziruka mu muhanda kubera urukundo rudashoboka ndigukunda!

Ubwo rero yaje koherezwa mu butumwa bw’akazi amara igihe adahari nkamukumbura nkabura uko ngira, nibwo twaganiriye kuri “WhatsApp” inkuru ziba inkuru sinifuzaga ko dutandukana kuko twaravuganaga umutima wanjye ukamerewa neza, stress zose zigashira nkamera nk’umuntu uri mu yindi si, byagera igihe cyo kuryama nkasinzira nk’uruhinja. Nifuzaga kwigumira muri ibyo bihe,n ibwo rero yaje kumbwira ko ankunda numva yorosoye uwabyukaga! Nahise ngira ubwoba, ndatitira, ndinanura mbura aho ndeba, ni uko nanjye ndamusubiza mubwira ko mukunda.

Ubwo urugendo rw’urukundo rwaratangiye nako rwakomereje aho! Aho yagarukiye twarahuye turahoberanaaaaaaaa bishyira kera hahandi uhita wumva indwara zose wari ufite zikize, njye rero rwose n’ubu iyo muhobeye mba numva nakurikizaho gusinzira! Ibyari inzozi byabaye impamo nibwo twatangiye gusubiramo uko buri wese yabonaga undi tugaseka, tukumirwa tugahoberana mbese rwose urukundo rugakura urwumva. Tukajya tubazanya tuti harya tumaze igihe kingana iki tumenyanye ugasanga muri make dushobora kuba twararerewe hamwe kuko ntibyumvikanaga ukuntu twahuzaga.

Naje kurwara amavi nanirwa kugenda aho uwandebaga wese yabonaga nteye agahinda, mara igihe kingana n’amezi 7 ntakora nirirwa ndyamye, ibaze kubabara amaguru n’amavi ukongeraho urukumbuzi, burya rero urukumbuzi narwo ni indwara. Yambaye hafi akajya ansura, akajya amperekeza kwa muganga, njye numvaga azandambirwa akansezerera ahubwo niko urukundo rwarushagaho gukura no kuba rwiza nkanezezwa no gusinzira amaze kumpamagara. Hagati aho rero nawe yaje kurwara amara nk’ukwezi barabuze indwara noneho ndamubaza nti: “Ese wumva umeze ute?” Ati: “Rero muri make ndwaye ibintu bidasobanutse ku buryo ntashobora kubisobanurira umuntu ati ariko m mutima wanjye numva nshaka wowe umwamikazi w’umutima wanjye!” Ati: “Rero ubishoboye waza ugatwara uyu mutima umbuza amahoro ukunsaba buri munsi kuko sinishoboreye.” Munyumvire namwe! Naje gukira nsubira mukazi nkomeza kwivuza ariko ampora hafi bishoboka byose. Naje gukira rero dusanga bwa burwayi bwaragiriye akamaro urukundo rwacu. Ngo: “Mu byiza no mu bibi niko bavuga”

Icyo gihe twakoreraga I Butare nuko dufata gahunda yo gutemberera I Kigali muri restaurant nziza rwose nk’uko yabinsezeranyije. Igihe cyacu kiragera turasohoka nyine! Iryo joro ryabaye ibitangaza kuko niho yansabye kumubera umugore mbyemera nta gutinda, ubwo yari yatumiye mushiki we na musaza wanjye, weekend yakurikiyeho twakoze ubukwe burimo abantu 20 namwe munyumvire. Ukwa buki twagukoreye ku Kibuye ahantu heza cyane hitwa Rwiza.

Urukundo nyakuri kandi rw’umwimerere rubaho, hahandi uwo ukunda umwifuriza icyiza, ugaharanira ko ahora acyeye ku mutima ndetse no ku mubiri. Aho iyo ubabaye uhozwa ukagarura akanyamuneza, aho iyo umaze amasaha atatu cyangwa abiri utazi uko undi yaramutse ukuka umutima. Abo urukundo rutarageho mukomeze mwihangane mutegereze murahishiwe, aho urukundo rugeze ntirwihishira, abo urukundo rubabaza mubitekerezeho neza mwitonze muhitemo kwishima aho kubabazwa witwa ko ukunda. Urukundo ntirubabaza ahubwo ruromora, mu rukundo nta gahato kabamo, mu rukundo habamo icyizere, urukundo rutanga umwuka mwiza ntirutera ubwoba, urukundo rurizana, urukundo isaha n’isaha ruraza icyo dusabwa ni ugutegereza isaha y’urukundo ikagera rugakomanga ukarukingurira, ntiruza nk’umushyitsi ruza nk’umusangwa, ruza rwiyoroheje ,ruzana icyizere cy’ejo hazaza ibyari byarapfuye bikazuka, ibyendaga kujugunywa bikagarurirwa ubuzima, urukundo aho rukubise haroroha, ubuzima bukagaruka, ukavuka bundi bushya.

Humura ntarirarenga, humura uwawe azaza, humura igihe cyawe cyizagera gusa genda gake ibyawe biri mu nzira.

Ubu njye n’umwami w’umutima wanjye tubayeho neza, dufite abana batatu ,ntabeshye tubayeho neza kuko dukundana, ibyo mu rugo tubishyira ku murongo mu bwumvikane, kurakaranya no kutumva ibintu kimwe ntibyabura ariko tubikemura gisirimu nk’abantu bafashe inzira imwe. Abaturanyi,abo mu miryango yacu barumiwe kubera ukuntu dukundana! Ndamutekera akishima ,mutegurira imyenda akishima, ndamwubaha akanezerwa, ndamutetesha agata umutwe! Nemera ntashidikanya ko ya paradizo nto twayigezemo. Umutima wanjye wari warabaye ibuye wabaye umutima w’umubiri, umubiri wanjye wari warumagaye wabaye umubiri utoshye ku bw’urukundo rwinshi kandi ruzima.

Ubu rero hari inzu y’indoto twatangiye kubaka ahantu hirengeye niyuzura tuzayimukiramo, gusa ntakitwirukansa twubaka gahoro gahoro uko tubonye ubushobozi, ntidusesagura dukora ikintu twateguye hakiri kare, ntitujya dushwana ngo amafaranga twayakoresheje nabi kuko dukurikiza ubushobozi dufite, kandi tubayeho neza pe. Ntitugikorera aho twamenyaniye dusigaye twikorera twigisha abantu uko bakora imishinga ndetse tukanatanga amasomo yo kurwanya imirire mibi.

Impamvu dukwiriye kwakira neza impinduka

Iyo hagize ibihinduka k’uburyo wari ubayeho akenshi biratonda kubimenyera!reka mbahe urugero nifashishije inkuru y’umugore wagiraga amahane wari ufite umwana umwe. Igihe kimwe umukobwa wamurereraga umwana yarasezeye haza undi mushya,uwo mushya imikorere ye ntiyari imwe n’iyumukobwa wagiye.Byari bitandukanye cyane.Gukora isuku agakora gahorooo,koza amasahani bika uko,mbese umugore yiha gahunda yo kumwerekera ndetse no gucisha make kugirango bumvikane bakorane neza.

Icyumweru cyambere,icyakabiri bigenda bihinduka ariko bitaragera kurwego yifuza ,muri uko gufashanya,umugore yateguraga umwana mbere y’uko ajya kwishuri,kumwambika,kumugaburira,mbese kumutegura muburyo bwose!icyaje gutangaza uwo mugore ni ukuntu yabyakiriye neza kuko byamwongereye umwanya wo kubonana n’umwana we mbere y’uko ajya ku ishuli,mbese akajya kukazi agenda asubiramo uturirimbo umwana yamuririmbiraga akumva aranyuzwe m’umutima.Niho rero yatangiye kubonako impinduka m’ubuzima ziba zikenewe no kwakirwa neza n’umutima utuje.

Ubusanzwe yatahaga ananiwe agasanga umwana yariye asigaje gukora devoir bamara kuyikora bagahita basinzira,mugitondo babyukaga ategurwa n’umukobwa wagiye wari umenyereye akazi no murugo we ntibabonane umwanya uhagije mugitondo Kuko babaga bihuta namwe murabizi uko biba byifashe mugitondo.

Mureke twige kwakira impinduka n’umutima utuje kandi twibande cyane mugushaka icyiza kibirimo  kuko bizadufasha kurenga byinshi no kugera kuri byinshi!